Varnarliðsmanni birt ákæra í dag

Ákæra ríkissaksóknara á hendur bandarískum varnarliðsmanni, sem er í haldi vegna hnífsstungumáls í Hafnarstræti í Reykjavík, verður birt í Héraðsdómi Reykjavíkur í dag. Væntanlega verður einnig farið fram á áframhaldandi gæsluvarðahald yfir manninum, sem var handtekinn í kjölfar þess að ungur Keflvíkingur hlaut lífshættulegar hnífsstungur í hópslagmálum í Hafnarstræti 1. júní sl. Varnarliðsmaðurinn hefur játað að hafa beitt hnífi í átökunum. Varnarliðið vill fá manninn afhentan en ríkissaksóknari neitar því þrátt fyrir að utanríkisráðuneytið hafi fallist á framsal, að sögn RÚV. Þar er haft eftir Agli Stephensen, saksóknara hjá lögreglunni, að málið sé afar flókið því fleiri en einn eru grunaðir um árásina.