Varnarliðið greiðir upp kjarasamninga

Samkvæmt heimildum Víkurfrétta hefur starfsmannahald Varnarliðsins á Keflavíkurflugvelli fengið heimild til að greiða starfsfólki sínu launahækkanir sem voru innifaldar í kjarasamningum frá árinu 2000. Þar verða greiddar upp hækkanir frá marsmánuði og launaskrið frá nóvember síðastliðnum.

Mikil ólga var í starfsfólki vegna þessa máls og voru tugir málsókna í undirbúningi á hendur varnarliðinu vegna meintra vanefnda.

Kristján Gunnarsson sagðist í samtali við Víkurfréttir vera mjög ánægður með að málið skuli vera í höfn. „Með þessu er miklu fargi af mönnum létt! Við vorum að vinna á fullu í væntanlegum málsóknum og hefðum lagt fram stefnur í næstu viku ef ekkert hefði gerst.“

Kristján bætti því við að starfsmenn varnarliðsins væru afar fegnir því að fá loks þær launahækkanir sem þeim bar.