Útsvar Grindvíkinga lækkar í 14,28

Bæjarstjórn Grindavíkur samþykkti á fundi sínum í vikunni að lækka álagningarhlutfall útsvars um 0,20% eða niður í 14,28%. Þá voru samþykktar álagningarreglur fasteignagjalda fyrir næsta ár en hún felur í sér óbreytt hlutföll frá árinu 2012 að því undanskildu að vatns-og fráveitugjöld lækka úr annarsvegar 0,14% og hinsvegar 0,13 í 0,11% af fasteignamati. Sorphirðu-og sorpeyðingargjöld hækka samtals um 1.210 kr. á ári og aukavatnsgjald hækkar úr 15 í 16 kr./m3.

Þá var samþykkt þjónustugjaldskrá fyrir árið 2013. Almennt hækka gjaldskrár um 5% í samræmi við verðlagsbreytingar.  Greiðsluþátttaka foreldra í skólamáltíðum grunnskóla verður 60% af innkaupsverði. Áætlað er að innkaupsverð frá Skólamat verði um 540 kr. frá 1. janúar 2013, þannig að greiðsluþátttaka foreldra verði um 325 kr.

Bæjarstjórn samþykkti tillögu hafnarstjórnar um breytingu á þjónustugjaldskrá Grindavíkurhafnar fyrir árið 2013. Almennt hækkar gjaldskráin um 5% í samræmi við verðlagsbreytingar, en aflagjöld verði óbreytt.

Tekjuviðmið 2013 vegna afsláttar elli- og örorkulífeyrisþega á fasteignaskatti og fráveitugjaldi voru jafnframt samþykkt. Viðmiðin hækka um 5% frá árinu 012.