Tvö jólabörn á Suðurnesjum

Jólabörnin á Suðurnesjum eru tvö að þessu sinni, bæði fædd á jóladag. Fyrra barnið var stúlka, fædd kl. 13:15. Foreldrar hennar eru Inga Björg Símonardóttir og Ekasit Thasaphong í Grindavík. Seinna jólabarnið var hins vegar drengur sem fæddist þegar klukkuna vantaði 20 mínútur í níu á jóladagskvöld. Hann var 14.5 merkur og 54 sentimetrar. Foreldrar hans eru Kristinn Sörensen og Margrét Mary Byrne. Kristinn á fyrir þrjú börn en Margrét Mary eitt.
Báðum jólabörnunum heilsast vel. Stúlkan úr Grindavík var farin heim með foreldrum sínum þegar ljósmyndari átti leið um fæðingardeildina. Jóladrengurinn var hins vegar klæddur í jólasveinabúning og er á meðfylgjandi mynd með foreldrum sínum sl. sunnudag.