Tvö ísraelsk flugfélög fljúga til Íslands í sumar

Fyrsta flugvél ísraelska flugfélagsins El Al frá Tel Aviv í Ísrael til Íslands lenti á Keflavíkurflugvelli um kl. 14 í gær. Flugvélin var af gerðinni Boeing 787 Dreamliner.

Ferðin í gær var sú fyrsta af fimm hjá félaginu til Íslands í sumar með hóp ferðafólks frá Ísrael. Flogið verður til 18. ágúst. El Al bætist þannig í hóp með þeim tuttugu flugfélögum sem þegar hafa hafið flug til og frá Keflavíkurflugvelli nú í sumar.

Í lok júlí, nánar tiltekið þann 27. júlí næstkomandi, bætist ísraelska flugfélagið Arkia í hópinn. Arkia flýgur fimm ferðir með ísraelska ferðahópa til landsins fram til 31. ágúst.

Hvorugt flugfélagið hefur flogið áður til Keflavíkurflugvallar og eru þau boðin velkomin til landsins.