Tvö álver í Helguvík? - eða fer Norsk Hydro á Keilisnes?
Norsk Hydro á í viðræðum við orkufyrirtæki um að reisa álver á Íslandi, að því er forstjóri fyrirtækisins, Eivind Reiten, greinir frá í nýrri frétt á vef Forbes og greint er frá á vefnum Eyjan.is nú áðan.
Reiten greindi blaðamönnum í Osló frá því að álbræðsludeild fyrirtækisins ætli sér stóra hluti á alþjóðlegum mörkuðum og muni auka framleiðslugetu sína umtalsvert næstu árin.
„Það sem ég get staðfest er að við eigum í viðræðum við orkufyrirtæki á Íslandi varðandi möguleika á Íslandi,” sagði Reiten. Ekkert kemur fram um staðarval, en þeir staðir sem helst er rætt um varðandi álver hér á landi eru Helguvík, Bakki við Húsavík og Keilisnes. Norðurál hefur haft forskot varðandi byggingu álvers í Helguvík, Alcoa á Bakka en varðandi Keilisnes hefur m.a. verið rætt um að Alcan flytji álver sitt þangað frá Straumsvík í kjölfar þess að stækkun álversins var hafnað í íbúakosningu í vor.
Reiten segir að Ísland sé ennþá eitt þeirra landa þar sem næg orka er til staðar fyrir slíkt álver. “Ísland er góður staður. Við erum að kanna möguleikana á álveri þar en málið er enn á frumstigi,” segir Reiten á vef Forbes.
Norsk Hydro rekur skrifstofu á Íslandi og í samtali við vísi.is þann 13. þessa mánaðar sagði starfsmaður fyrirtækisins hér á, Bjarne Reinholdt, segir að þótt Hydro- menn vilji gjarnan hefjast handa sem fyrst líti þeir á þetta sem langtímaverkefni og þeir séu þolinmóðir. Spurður um staðsetningu nefndi hann að Hydro hafi verið að skoða Þorlákshöfn og Keilisnes en einnig fleiri staði.
