Tveir hnúfubakar skemmta hvalaskoðurum
- ferðamönnum finnst geggjað að fara í óveðursferð á Reykjanes
Tveir hnúfubakar hafa síðstu daga haldið sig nærri landi í Leiru og við Keflavík. Það hefur því ekki verið langt fyrir hvalaskoðunarbátinn Margréti að fara með áhugasamt hvalaskoðunarfólk.
WHALEWATCHINGREYKJANES.IS gerir út hvalaskoðunarbátinn Margréti SU-4 frá smábátahöfninni í Gróf í Keflavík. Boðið er upp á daglegar ferðir úr Grófinni kl. 13 en einnig er í boði að fara ferð í birtingu ef fólk á bóka flug eftir hádegið.
Axel Már Waltersson, sem sér um hvalaskoðunarsiglingar á Margréti, sagði í samtali við Víkurfréttir að það hafi verið mikið að gera undanfarið í hvalaskoðunarsiglingum frá Keflavík en þar stjórnast þó allt af veðri og ekki er farið ef alda er meiri en 1,5.
Síðustu daga hefur ekki þurft að sækja lengra en í Leiruna og þaðan hefur hvalnum svo verið fylgt til Keflavíkur. Aðspurður sagði Axel að hótelin á svæðinu væru dugleg að senda til hans fólk í ferðir. Þá hefur hvalaskoðunin hans verið að fá góða einkunn á TripAdvisor og er þar með fimm stjörnur. „Við ætlum að halda þeim áfram og högum okkur eftir því,“ sagði Axel.
Ef ekki er veður til að fara á sjó þá býðst fólki að fara í ævintýraferð um Reykjanesskagann og skoða náttúruperlur. Þá er Axel einnig farinn að bjóða upp á „óveðursferðir“.
„Ef ekki er veður til siglinga er viðskiptavinum boðið að fara í óveðursferð um Reykjanesið. Þá er ekið á þá staði þar sem aðlandsvindur er og gestir geta upplifað brimið berja klettana við ströndina. Í ferðinn er einnig komið við í Garði og Garðskaga, Reykjanesvita og við Gunnuhver,“ segir á vef WHALEWATCHINGREYKJANES.IS.
Axel sagði að gestum sínum finnist það geggjað að fara út á Reykjanes og fá haustlegan vind í fangið. Til að fyrirbyggja allan misskilning þá er ekki verið að fara með fólk í hættulegar aðstæður en Íslenskt hvassviðri sé vinsælt en ekki sé verið að fara með ferðamenn í óvissu þar sem vindurinn slái í 40 metra á sekúndu.
Í samtali við blaðið sagðist Axel horfa björtum augum til sumarsins. Hann sé að fá nýjan farþegabát í hvalaskoðunarferðir og þá fái Margrét SU frekara hlutverk sem sjóstandaveiðibátur, en sjóstangaveiði sé eitt af því sem fyrirtækið bjóði uppá, auk norðurljósaferða.
