Tveir frá Reykjanesbæ á hamfarasvæðin á Haiti

Flugvél Icelandair fer frá Keflavíkurflugvelli núna klukkan tíu með 32 sérþjálfaða rústabjörgunarmenn frá Íslensku alþjóðabjörgunarsveitinni áleiðis til Haiti, þar sem öflugir jarðskjálftar riðu yfir í gær.

Tveir rústabjörgunarmenn frá Björgunarsveitinni Suðurnes eru í þessu 32ja manna björgunarliði, þeir Halldór Halldórsson og Haraldur Haraldsson.

Björgunarsveitarfólk í Reykjanesbæ hóf að undirbúa brottförina til Haiti strax uppúr miðnætti í gær.

Björgunarsveitin Suðurnes er með tilbúinn búnað fyrir fjóra menn en þar sem aðeins tveir þeirra fara út nú á eftir þurfti að minnka birgðirnar.

Íslenska alþjóðabjörgunarsveitin sameinaðist svo í höfðustöðvum sveitarinnar á öryggissvæðinu á Keflavíkurflugvelli undir morgun með allan sinn búnað. Hann er nú kominn um borð í þotu Icelandair sem mun flytja björgunarsveitina niður til Haiti. Fyrst verður flogið til Boston í Bandaríkjunum og þaðan verður haldið áfram annað hvort beint til Haíti eða Dóminíska Lýðveldisins. Ræðst það af ástandi flugvallarins á Haíti. Flugturninn í höfuðborginni hrundi í skjálftanum og flugumferðarstjórn fer fram í bifreið á flugvellinum.

Auk sérþjálfaðra rústabjörgunarmanna fara tveir flugvirkjar með vélinni. Þeir taka með sér varadekk og tjakk, því ef eitthvað fer úrskeiðis á flugvellinum á hamfarasvæðinu, þá er lítil von um utanaðkomandi aðstoð.

Íslenska alþjóðabjörgunarsveitin er vel tækjum og búnaði búin og getur starfað án allrar utanaðkomandi aðstoðar í sjö sólarhringa. Hópurinn sem fer utan nú á eftir gerir ráð fyrir því að geta verið hálfan mánuð á hamfarasvæðinu.

Það er utanríkisráðuneytið í samstarfi við Slysavarnafélagið Landsbjörg sem bauð fram aðstoð Íslands sem stjórnvöld á Haiti þáðu í nótt. Íslenska hjálparsveitin verður með fyrstu erlendu björgunarsveitunum sem koma á hamfarasvæðið á Haiti.