Tveir af hverjum þremur komnir með vinnu að nýju

Atvinnuleysi í Reykjanesbæ heldur áfram að dragast saman og mældist 9,7% í lok septembermánaðar. Það er lægsta frá því í desember 2019 þegar atvinnuleysi mældist 8,9% en fór hæst í 24,9% um síðastliðin áramót. Lætur nærri að tveir af hverjum þremur sem voru atvinnulausir þegar hæst lét séu komnir af skrá. Þetta kemur fram í gögnum af síðasta fundi menningar- og atvinnuráðs Reykjanesbæjar.

Atvinnuleysi er nú lægra en það var áður en áhrif Covid-19 komu fram. Gera þarf ráð fyrir árstíðarsveiflum og mikilvægt að fylgjast með þróun í flugi á komandi mánuðum. Alls voru 1.109 einstaklingar skráðir í atvinnuleit um mánaðarmót. Þar af 610 karlar og 499 konur.

Með opnun landamæra í Bandaríkjunum gæti flug yfir Atlantshafið aukist og því bindur menningar- og atvinnuráð vonir við að aukin umsvif því fylgjandi muni vega upp á móti samdrætti sem í eðlilegu árferði myndi fylgja vetrartíðinni.

Þrátt fyrir að atvinnuleysi hafi dregist mikið saman á undanförnum mánuðum eru engu að síður 292 einstaklingar sem hafa verið skráðir atvinnulausir á seinustu sex mánuðum, fleiri en tilheyra hópnum sem hefur verið frá sex til tólf mánuðum á skrá.

Athyglisvert verður að fylgjast með þessum tölum á komandi mánuðum en gera má ráð fyrir að einhver hluti þeirra sem nú eru með starf í gegnum úrræði VMST komi aftur á skrá. Þeir einstaklingar verða væntanlega flokkaðir í samræmi við þann bótarétt sem þeir hafa nýtt, segir í fundargerð menningar- og atvinnuráðs.