Tugir listamanna selja verk sín í Svarta Pakkhúsinu

„Hér er mikið af keramik og skartgripum, alls konar heklað. Gæðin eru á toppnum,“ segir Kulli Kuur, ein af listamönnunum sem sýnir og selur verk sín í Svarta Pakkhúsinu á Hafnargötu í Keflavík.

„Það er allt milli himins og jarðar hérna. Alltaf þegar ég mæti byrja ég á því að labba einn hring og skoða hvað verkin eru falleg og vel gerð,“ segir Kulli, en ásamt henni eru um það bil tuttugu aðrir listamenn með aðstöðu í Svarta Pakkhúsinu. Kulli selur hekluð sjöl en hún lýsir þeim þannig að menningarheimar síns lands, Eistlands, og Íslands mætist.

Eitt af sjölunum frá Kulli.

Gerður Sigurðardóttir selur einnig sín listaverk í Svarta Pakkhúsinu en þau bera heitið „Ljós í tilveruna“. „Það voru margir sem höfðu samband eftir Ljósanótt sem vissu ekki að það væri opið alla daga hjá okkur. En það er brjálað að gera á Facebook. Hótelin hafa líka verið að benda ferðamönnunum á okkur,“ segir Gerður, en útlendingar versla mest í Svarta Pakkhúsinu.

„Ljós í tilveruna“ eftir Gerði Sigurðardóttur. VF-mynd: Sólborg

Opið verður til kl. 20 í kvöld í tilefni af Svörtum föstudegi.