Tölvu, flökkurum og upptökuvél stolið frá NFS

Eins og Víkurfréttir greindu frá fyrir skemmstu varð Virkjun á Ásbrú fyrir barðinu á þjófum. Ýmsir aðilar höfðu komið sér upp aðstöðu í Virkjun, og var Nemendafélag Fjölbrautaskóla Suðurnesja meðal þeirra.

,,Þarna var myndefni frá félagslífinu yfir seinustu þrjú ár. Það var bæði í tölvu nemendafélagsins sem var stolið, og á tveimur flökkurum. Eina vonin er að finna upprunalegu spólurnar með efninu, en þó við fyndum það, þá höfum við enga tölvu til að klippa efnið í," segir Sigurður Jónsson, íþróttameistari og meðlimur í skólaþættinum Hnísunni.
,,Það verður tómt vesen að klára önnina eftir áætlun, en við reynum að finna einhverja lausn á þessu."

Þjófarnir tóku borðtölvu, tölvuskjá, upptökuvél og hljóðkerfi í eigu nemendafélagsins. Búnaðurinn hefur verið notaður til að klippa saman skólaþátt nemendafélagsins, Hnísuna, og vinna að skólablaðinu, Vizkustykki, og því seinni hluti skólaársins í óvissu.