TÓLF TÖLVUR URÐU VÍRUS AÐ BRÁÐ!

Njarðvíkurskóli varð fyrir því áfalli sl. mánudag að tölvuvírusinn CIH ræsti sig í öllum tölvum skólans nema nýja stoltinu skólastjórans. „Já, það er ljóst að við verðum tölvulausir í dag. Ég er með nýja tölvu og hún ein slapp. Þegar kveikt var á tölvunum í morgun hrundu stýrikerfi þeirra hvert af öðru. Sem betur fer eru öll gögn afrituð tvisvar á sólarhring en 12 móðurborð eyðilögðust og tjónið er metið á u.þ.b. 260 þúsund fyrir utan tímatap og vinnu við uppsetningar og lagfæringar“ sagði Gylfi Guðmundsson skólastjóri í samtali við VF. CIH-vírusinn er upprunalega frá Asíu og ræsir sig árlega þann 26. apríl. Hann dreifist hægar en margir aðrir vírusar en veldur undantekningalaust umtalsverðum skemmdum.