Tilboð gerð í draugaskip í Njarðvíkurhöfn

Gert hefur verið tilboð í draugaskipið Kristbjörgu VE sem legið hefur í Njarðvíkurhöfn um árabil. Einnig hefur verið gert tilboð í prammann sem legið hefur við höfnina síðustu þrjú ár. Fyrirtækið sem gert hefur tilboð í draugaskipin er danskt og ætlar sér að nota skipin til niðurrifs í brotajárn.

Kristbjörgin VE hefur legið við höfn í Njarðvík um árabil mörgum til mikils ama. Að sögn Péturs Jóhannssonar hafnarstjóra í Reykjanesbæ eru menn þar á bæ fegnir að loks sjái fyrir endann á því að skipin liggi þarna við festar. 

Pramminn sem danirnir hafa gert tilboð í var notaður við grjótflutninga í grjótvarnargarð við Keflavíkurhöfn. Pramminn hefur reynst dauðagildra fyrir æðarfugl, en tilkynnt hefur verið um nokkra fugla sem drepist hafa með því að kafa undir prammann og festast þar undir.

Gert er ráð fyrir að skipin fari úr höfninni í sumar.

Myndirnar: Á myndunum má sjá Krisbjörgu VE og prammann við Njarðvíkurhöfn. VF-ljósmynd/Jóhannes Kr. Kristjánsson.