Þyrlubjörgunarsveit varnarliðsins færður óvenjulegur virðingarvottur

Félagsskapurinn „ICE-NATO-US Friendship Club“ heiðraði fyrir nokkru þyrlubjörgunarsveit varnarliðsins á Keflavíkurflugvelli með óvenjulegum minjagrip um frækilegt flugafrek við afar erfiðar aðstæður. Þyrla frá sveitinni bjargaði einum skipverja af vélbátnum Svanborg SH 404 sem strandaði við Skálasnagavita á Snæfellsnesi þann 7. desember sl.

Vináttufélag þetta hefir starfað í 25 ár og eitt af markmiðum helstu markmiðum þess er að fylgjast náið með og fræðast um starfsemi Varnarliðsins á Keflavíkurflugvelli með sameiginlega hagsmuni Íslands og varnarstöðvarinnar að leiðarljósi. Árlega er skipulögð sérstök kynnisferð á Keflavíkurflugvöll þar sem eitt starfssvið er tekið til sérstakrar skoðunar.
Að þessu sinni kynnti félagið sér starf þyrlusveitarinnar frá öllum sviðum mjög náið og við það tækifæri færði félagið sveitinni óvenjulegan virðingarvott, fagurlega sæveðraðan blágrýtisstein með áletrun á silfurskildi þar sem gert er grein fyrir um hvaða björgun sé að ræða.
Þess má geta að þyrlubjörgunarsveitin er deild innan bandaríska flughersins og hefur yfir að ráða fimm þyrlum af gerðinni Pave-Hawk HH-60 og einni Boeing KC-135. Liðsmenn sveitarinnar eru 110 talsins og á þeim rúmlega 30 árum sem sveitin hefur starfað hér á landi hefur hún bjargað 300 mannslífum, þar af 171 Íslendingi.