Þvílíkt rusl út um allt!

Nemendur í 2. F við Grunnskóla Grindavíkur tóku sig til á föstudag, þegar þau gengu frá Hópsskóla í gegnum íþróttasvæðið og hjá sundlauginni og víðar, og hirtu upp allt rusl sem á vegi þeirra varð, nema glerbrot, enda hættulegt týna það upp fyrir litla fingur.

Sigríður Fjóla Benónýsdóttir kennari sagði að krakkarnir hefðu týnt upp ótrúlega mikið rusl á þessari stuttu leið. Þegar þau voru t.d. hálfnuð þurftu þau að snúa við til að losa sig við alla plastpokana í Hópsskóla til að geta haldið áfram að hirða ruslið með nýja poka.

Voru það skýr skilaboð frá þessum kláru krökkum til Grindvíkinga að hætta að henda rusli út um allt í bænum okkar. Þetta er bærinn okkar og við eigum að ganga vel um hann! Umgengnin lýsir innri manni!, segir á vefsíðu Grindavíkurbæjar.

Á myndinni eru krakkarnir í 2. F með hluta af því rusli sem þau týndu upp fyrir helgi.