Þrjú ný ferðarit komin úr prentun

Ferðamálasamtök Suðurnesja hafa gefið út þrjá nýja bæklinga fyrir ferðasumarið 2010. Fyrstan má nefna almennan bækling um Reykjanes á þýsku en áður hefur hann verið gefinn út á íslensku og ensku. Þá er kominn út gönguleiðabæklingur um Árnastíg og Skipsstíg. Þá hefur verið gefinn út bæklingur um bæjarhátíðir á Suðurnesjum þar sem greint er frá þeim hátíðum sem haldnar eru í sveitarfélögunum fimm á Suðurnesjum.

Árni Sigfússon, bæjarstjóri Reykjanesbæjar, tók við fyrstu eintökunum af þessum þremur bæklingum frá Kristjáni Pálssyni, formanni Ferðamálasamtaka Suðurnesja. Árni fagnaði framtakinu og sagði bæklingana vera góða viðbót inn í annars fjölbreytt úrval kynningarefnis um Reykjanesið.

Víkurfréttir unnu alla bæklingana til prentunar fyrir Ferðamálasamtök Suðurnesja en Víkurfréttir taka að sér hönnun og frágang á prentverki, allt frá nafnspjöldum upp í glanstímarit af stærstu gerð.

Mynd: Árni Sigfússon og Kristján Pálsson með þrjá nýja ferðabæklinga um Reykjanes. Víkurfréttamynd: Hilmar Bragi Bárðarson