Þrjá til fjóra lækna þyrfti að ráða til HSS

„Ef vel ætti að vera þyrfti að bæta við 1,5 til 2 stöðugildum lyflækna og einnig væri gott að óbreyttu að geta bætt við tveimur læknum á heilsugæsluna,“ segir Halldór Jónsson, forstjóri Heilbrigðisstofnunar Suðurnesja (HSS). Hann segir stöðu heilbrigðisstofnana og sjúkrahúsa á Íslandi þannig að erfiðlega hafi gengið að ráða í allar stöður lækna. „Sú staða hefur verið nokkuð lengi og er mismunandi eftir sérgreinum. Á HSS hefur staðan þó verið þokkaleg í heildina.“

Á HSS hefur verið brugðist við með skammtíma úrræðum og á legudeildinni einnig með samstarfi við heilsugæsluna til að tryggja þjónustuna. „Heilsugæslan þyrfti að hafa tvo lækna til viðbótar til að mæta vaxandi þjónustuþörf en hún helst í hendur við íbúafjölda, íbúaþróun, aldurssamsetningu og fleira. Allt þarf þetta þó að rúmast innan þeirra fjárveitinga sem ætlaðar eru til þessarar þjónustu,“ segir Halldór.