The Amazing Race: Allt á suðupunkti í Leifsstöð

Uppi varð fótur og fit í Flugstöð Leifs Eiríkssonar um hádegisbilið í dag þegar keppendur í The Amazing Race hlupu inn í flugstöðina með tilheyrandi hrópum og látum. Leið þeirra lá beint inn á söluskrifsstofu Flugleiða í Leifsstöð þar sem þau keyptu farmiða til Evrópu.

Ísland er fyrsti viðkomustaðurinn

Í ljós kom að í fyrri frétt Víkurfrétta var farið rangt með að 4 hópar væru eftir því að raunin varð sú að 11 hópar eru eftir. Þar afleiðandi er Ísland fyrsti viðkomustaður þessa þáttaraðar og því augljóst að hér hafi fyrsta hópnum verið vísað úr keppni. Bílastæðið við flugstöðina var prýtt jeppunum sem þau ferðuðust á um Ísland en flýtirinn var svo mikill að keppendur höfðu ekki einu sinni fyrir því að loka á eftir sér hurðum og gluggum.

Samkvæmt heimildum Víkurfrétta þurfa aðstandendur þáttarins að greiða kostnað vegna öryggisgæslu í flugstöðinni en hún er tilkominn vegna myndatöku á flugbraut og til þess að halda ljósmyndurum frá.

„Svakalegur hasar og mikið stress“

Ásborg Guðmundsdóttir, starfsmaður söluskrifsstofu Flugleiða, var ein af þeim sem afgreiddi hópinn en hún sagði að þau hefðu verið mjög stressuð. „Þau virtust halda að það væru fleiri ferðaskrifstofur og fleiri möguleikar á ferðum frá landinu,“ og bætti því við að það hefði verið mjög gaman að fylgjast með þessum svakalega hasar. „Aðalmálið var að komast úr landi sem fyrst,“ sagði Ásborg. Þau hafa lent í ýmsu á söluskrifstofunni en þó aldrei í svona miklum látum sagði Ásborg við Víkurfréttir.

Næsti stoppustaður er Osló

Eins og fram kom í frétt Víkurfrétta er gífurleg leynd í kringum allt þetta ævintýri og bendir allt til þess að nokkur fjöldi Íslendinga verði að hafa hemil á tungu sinni næstu mánuði. En samkvæmt áreiðanlegum heimildum Víkurfrétta er hópurinn allur í sömu flugvél á leiðinni til Kaupmannahafnar en hún fór í loftið rétt eftir eitt. Þaðan halda þau síðan til Osló þar sem næsti ratleikur fer fram.

Tugir húsbíla, fellihýsa og bílaleigubíla

Óformleg talning fór fram í Svartsengi í nótt á öllum þeim gífurlega fjölda fellihýsa sem var á svæðinu vegna þáttarins en þau voru á bilinu 25-30 ásamt tugum bílaleigubíla og húsbíla.

Miðað við umstangið í kringum upptökurnar á Íslandi er kostnaðurinn við svona raunveruleikaþátt gífurlegur. Sjónvarpsstöðin CBS mun sýna þessa þætti en þeir eru nú að sýna seríu 5. Áheyrnarpróf fyrir seríu 7 eru nú þegar hafnar í Bandaríkjunum.

Það er orðið nokkuð ljóst að Ísland er farið að bera mikið á sér vestanhafs því leið stjarnanna virðist liggja til Íslands með tilheyrandi fjölmiðlafári og gífurlegu umstangi.

Myndirnar: 1. Mikill æsingur skapaðist á söluskrifsstofu Flugleiða í Leifsstöð 2. Keppendur áttu í erfiðleikum með að rata út á Grindavíkurafleggjara 3. Fellihýsabyggð við Svartsengi.

VF-myndirnar: Atli Már Gylfason