Þakka farsælt og árangursríkt starf að öryggis- og björgunarmálum

„Bæjarstjórn Garðs þakkar Björgunarsveitinni Ægi farsælt og árangursríkt starf að öryggis- og björgunarmálum í Garði og á Suðurnesjum í 75 ár. Helstu viðfangsefni sveitarinnar eru leit og björgun við strendur Íslands, leit og björgun á landi og þátttaka í skipulagi Almannavarna Ríkisins“. Þetta kemur fram í fundargerð bæjarstjórnar Sveitarfélagsins Garðs í tilefni af 75 ára afmæli Björgunarsveitarinnar Ægis nú á dögunum..

Á þessum tímamótum gerði bæjarstjórn Garðs nýjan fjögurra ára samstarfssamning við björgunarsveitina. Samningurinn tekur á þátttöku sveitarinnar í björgunar- og almannavarnaverkefnum, framkvæmd áramótabrennu og tengdra verkefna, öryggisgæslu á Sólseturshátíð, framkvæmd unglingastarfs og almennan stuðning við rekstur sveitarinnar.