Þak og sólhús í ferðahug

Björgunarsveitirnar Þorbjörn í Grindavík og Suðurnes í Reykjanesbæ voru báðar kallaðar út í nótt og í morgun.

Í Grindavík var Þorbjörn kallaður út þar sem þak var að losna af húsi í bænum. Tryggðu björgunarsveitarmenn að ekki færi illa.

Í Reykjanesbæ sýndi sólhús á sér fararsnið og var björgunarsveitarfólk fengið til að tryggja að það fyki ekki út í veður og vind..

Björgunarsveitir Slysavarnafélagsins Landsbjargar hafa einnig verið í verkefnum víða um land í nótt og í morgun en nú gengur yfir fertugasta lægðin frá því 1. nóvember sem veldur stormi í einhverjum landshluta.