Tafir við landamæraeftirlit
Langar biðraðir hafa myndast við vegabréfaeftirlit í Flugstöð Leifs Eiríkssonar í morgun en mikil umferð farþega hefur verið inn í landið. Tafir geta orðið á millilandaflugi í dag þar sem færri hlið í landamæraeftirliti eru opin vegna verkfalls.
Landamæraverðir á Keflavíkurflugvelli eru félagar í SFR og hafa verið í verkfalli nokkra undanfarna daga. Landamæraeftirlit og vegabréfaskoðun hefur verið þannig háttað að vaktin er skipuð til helminga af lögreglumönnum og landamæravörðum. Aðeins lögreglumenn standa vaktina þar sem landamæraverðir eru í verkfalli í dag.
Margar vélar komu frá Bandaríkjunum í morgun sem síðan halda áfram til Evrópu nú með morgninum.
