Suðurnesjamenn tapa áttum á fullu tungli

Svo virðist vera sem Suðurnesjamenn tapi áttum þegar náttúran skartar fullu tungli. Lögreglumenn og læknar á Heilbrigðisstofnun Suðurnesja höfðu í nógu að snúast um helgina. Fjölmörg útköll bárust lögreglu vegna ölvunarláta og líkamsárásir voru nokkrar, auk annarra áverka.
Um kl. 03:30 aðfararnótt laugardags var óskað eftir lögreglu að veitingahúsinu Vitanum í Sandgerði vegna slagsmála.  Lögregla fór á staðinn.  Einn aðili var fluttur á Heilbrigðisstofnun Suðurnesja til aðhlynningar.  Leggja þurfti hann inn til frekari athugunar. 
Aðfararnótt sunnudagsins var mun fjörugri hjá lögreglu en nóttin áður eins og lesa má úr upplýsingum á vef lögreglunnar.
Kl. 02:10 kom aðili að máli við lögreglumenn, sem voru í vínveitingahúsaeftirliti í félagsheimilinu Stapanum, og tilkynnti um líkamsárás.  Hann sagði mann hafa lamið sig í andlitið.  Nefið á þolandanum virtist vera úr lagi gengið.  Vitað er hver árásarmaðurinn er. 
Kl. 02:22 höfðu lögreglumenn afskipti af einkasamkvæmi í félagsheimili við Hafnargötu í Keflavík.  Ekkert skemmtanaleyfi var til staðar.  Sérstakt leyfi þarf hjá lögreglustjóra ef skemmtun (afmæli eða þess háttar), sem haldin er í félagsheimili, stendur lengur en til 23:30.  Eins og í þessu tilviki þá var um að ræða afmælisfagnað og var afmælisbarninu gert að rýma salinn. 
Kl. 02:30 höfðu lögreglumenn afskipti af mjög ölvuðum manni þar sem hann kom út af félagsheimili við Hafnargötu í Keflavík.  Maðurinn kenndi mikið til í hendi og var hann fluttur á HSS til aðhlynningar.  Ekki er vitað hvað hafði komið fyrir manninn.  Er lögreglumenn hugðust aka honum til síns heima varð hann æstur og var með hótanir í garð lögreglumanna um að skalla þá.  Maðurinn var því vistaður í fangaklefa uns víman og bræðin rynni af honum. 
Kl. 03:23 var tilkynnt að maður hafi verið sleginn í andlitið með glasi í Stapanum í Njarðvík.  Lögregla og sjúkralið fór á staðinn.  Maðurinn var fluttur með sjúkrabifreið á HSS til aðhlynningar.  Hann hafði hlotið nokkra skurði í andliti.  Einn maður var handtekinn vegna málsins.  Hann þurfti einnig að leita til læknis vegna áverka á höndum. 
Kl. 03:52 var lögregla kölluð að skemmtistaðnum Ránni við Hafnargötu í Keflavík.  Þar höfðu menn lent í slagsmálum utan dyra og þurfti að flytja einn á HSS til aðhlynningar.  Í framhaldi á því var maðurinn fluttur með sjúkrabifreið á sjúkrahús í Reykjavík til frekari skoðunar en hann kenndi mikið til í fæti.