Stríðsmaður úr Sandgerði

Pétur Róbert MacIlroy, fyrrum Reynismaður, er að gera það gott í norskum fótbolta um þessar mundir og hefur fengið góða umfjöllun á íþróttasíðum þarlendra dagblaða. Pétur er 17 ára gamall og æfir með unglingaliði Askim en liðið tók þátt í Norway Cup fótboltamótinu sem fram fór í Osló nú í byrjun ágúst. Pétur flutti til Noregs um miðjan júní á þessu ári og komst strax í unglingalið Askim. Í sínum fyrsta leik með liðinu skoraði hann tvö mörk og sömuleiðis í næsta leik. Sunnudaginn 30. júlí hófst Norway Cup, sem stóð yfir í heila viku og þar komst lið Péturs í 16 liða úrslit, sem er lengra en Askim hefur komist áður.Af blaðaumfjöllun má dæma að Norðmenn séu ánægðir með vinnusemi Péturs og kalla hann stríðsmanninn sem aldrei gefst upp.