Stórt auglýsingaskilti féll til jarðar

Í nokkur ár hafa þrjú voldug auglýsingaskilti staðið við Reykjanesbrautina ofan Keflavíkur með þann tilgang að fá ferðamenn til að heimsækja Reykjanesbæ og nýta sér þá þjónustu sem þar er í boði. Hvert skilti er þriggja metra hátt og fimm metrar á breidd og þau taka því á sig töluverðan vind í þau fáu skipti sem eitthvað blæs að ráði í Reykjanesbæ.

Skiltin hafa staðið af sér hin mestu óveður síðustu ár en nú hefur eitt skitið látið undan veðurhamnum og fallið til jarðar. Þar voru auglýst hótel og veitingastaðir í Reykjanesbæ. Eftir standa skilti um víkinga og bátasafn einnig hvalaskoðunarferðir.

Veðurguðirnir hefðu frekar átt að fella skiltið um hvalaskoðunarferðirnar, enda hafa þær ekki verið í boði frá Reykjanesbæ í nokkur ár, nema þegar hvalaskoðunarbátar frá höfuðborginni hafa komið hingað í stakar ferðir.