STEFNUMÓTUN Í MÁLEFNUM ELDRI BORGARA
Á bæjarstjórnarfundi Reykjanesbæjar sl. þriðjudag var samþykkt samhljóða svohljóðandi tillaga í málefnum eldri borgara í bæjarfélaginu en flutningsmenn hennar voru þau Kjartan Már Kjartansson og Björk Guðjónsdóttir: „Bæjarstjórn Reykjanesbæjar samþykkir að fela Fjölskyldu- og félagsmálaráði að hefja vinnu við gerð stefnumótunar í málefnum eldri borgara. Kanna þarf viðhorf eldri borgara til heilbrigðismála, tómstundamála og félagslegrar þjónustu. Vinnunni verði lokið fyrir 1. apríl 1999.“ Í greinargerð sem fylgdi tillögunni segir að Sameinuðu þjóðirnar hafi samþykkt að árið 1999 verði ár aldraðra og skuli yfirskrift þess vera „Þjóðfélag fyrir fólk á öllum aldri“. Við stefnumótunarvinnuna verði haft samráð við hina ýmsu aðila sem tengjast og gætu tengst málefnum eldri borgara í sveitarfélaginu. Flutningsmenn tillögunnar lögðu ríka áherslu á að haft verði samband við alla hugsanlega aðila sem gætu komið að þessu máli og nefndu t.a.m. líkamsræktarstöðvar í því samhengi. Þar væru hugsanlega lausir tímar á ákveðnum tímum dagsins sem e.t.v. gætu höfðað til þessa hóps. Fögnuðu aðrir fundarmenn tillögunni og var hún eins og áður segir samþykkt samhljóða.
