Starfsmenn Suðurness fá atvinnutilboð

Til fiskvinnslufyrirtækisins Suðurness í Reykjanesbæ hafa borist fjölmörg atvinnutilboð frá öðrum fiskvinnslufyrirtækjum. Útlit er fyrir að allir starfsmenn fari í önnur störf fljótlega, segir Helga Rut Guðjónsdóttir, trúnaðarmaður starfsmanna í samtali við RÚV.

Helga Rut segir að starfsmenn fyrirtækisins fari í sumarfrí í dag en ekki hefur verið unnið í verksmiðjunni frá því á þriðjudag. Uppsagnarfresturinn taki gildi 1. september næstkomandi. Þeir starfsmenn sem ekki hafi fengið störf fyrir 23. ágúst eigi rétt á launum samkvæmt samningum. 45 starfsmönnum var sagt og kemur meirihluti þeirra frá Taílandi, Filippseyjum og Póllandi. 6 Íslendingar starfa hjá fyrirtækinu.

Stefanía Valgeirsdóttir, framkvæmdastjóri Suðurness, segir að fiskvinnslufyrirtæki frá Reykjanesbæ og víðar hafi boðið starfsmönnum fyrirtækisins atvinnu. Farið verði yfir málin með öllum starfsmönnum eftir helgi.