Sofnaði undir stýri

Bifreið hafnaði utanvegar á Reykjanesbraut, norðan við Grænás í nótt. Ökumaður bifreiðarinnar kvaðst hafa sofnað í akstri og vaknað er hann var kominn yfir á mölina á vegaröxlinni, á öfugum vegarhelmingi.

Hann reyndi þá að koma bifreiðinni upp á veginn aftur, en bifreiðin snerist og rann út af veginum og stöðvaðist á stóru grjóti. Vinstri hlið og undirvagn skemmdust mikið og var bifreiðin flutt burtu með kranabifreið. Ökumaðurinn, sem var einn í bifreiðinni, slasaðist ekki.

Myndin er úr safni VF