Slompaður ökumaður bílaleigubíls missti af flugi

- sagði félaga sinn hafa ekið bílnum og eiga koníaksflösku sem var í fórum hans.

Erlendur ferðamaður sem kom til að skila bifreið til bílaleigu á Keflavíkurflugvelli um helgina reyndist vera vel slompaður undir stýri. Var hann jafnframt með koníaksflösku í bílnum. Starfsmenn bílaleigunnar kölluðu lögregluna á Suðurnesjum á vettvang. Þegar lögreglumenn bar að tók ferðamaðurinn á sprett og lét sig hverfa. Hann var handtekinn skömmu síðar.

Á lögreglustöð neitaði maðurinn að hafa ekið en kvað ónefndan ferðafélaga sinn hafa verið undir stýri. Hann hefði einungis sest í sæti ökumanns til þess að slökkva á bifreiðinni. Félaginn ætti einnig flöskuna. Sagði hann þá tvo eiga að mæta í flug til Berlínar á næstu mínútum.

Þegar maðurinn var spurður hvers vegna hann hefði tekið til fótanna þegar hann sá lögreglu kvaðst hann hafa verið að hlaupa í átt að flugstöðinni til að láta vita að hann og ferðafélagi sinn væru rétt ókomnir.

Maðurinn missti af fluginu, en var látinn laus að loknum skýrslu,- og sýnatökum.