Slökkviliðsmenn á Vellinum ósáttir: Ganga út 1. ágúst

Flugmálastjórn á Keflavíkurflugvelli hefur sagt upp samningum sínum við slökkviliðsmenn á Keflavíkurflugvelli um tuttugu klukkustunda fasta yfirvinnu á mánuði fyrir ýmis viðhaldsstörf. Slökkviliðsmenn eru ósáttir við þetta ráðslag og líta á það sem uppsögn kjarasamnings í heild. Þeir munu ætla að ganga út 1. ágúst næstkomandi. Fréttablaðið greinir frá þessu í morgun.

Valdimar Leó Friðriksson, framkvæmdastjóri Landssambands slökkviliðs og sjúkraflutningamanna, segir í samtali við Fréttablaðið að umrædd yfirvinna sé 20% af föstum launum. Haft er eftir Stefáni Thordersen, flugvallarstjóra, að ekki sé litið á þetta sem uppsögn á kjarasamningi heldur eingöngu uppsögn á aukagreiðslum vegna breytinga á fyrirkomulagi.