Skora á útgerðarmenn og sjómenn að semja

Bæjarstjórn Sandgerðisbæjar sendi í gær frá sér áskorun til útgerðarmanna og sjómanna um að einhenda sér í að ná samningum svo enda megi verkfall sjómanna. Í áskoruninni segir að langvarandi verkfall skaði íslenskan efnahag; útgerð, sjómenn, fólk í fiskvinnslu, flutningsaðila og samfélögin við sjávarsíðuna. „Ábyrgð þeirra sem fara með samningsumboð er mikil og krafan á samningsaðila er að gera allt það sem mögulegt er til að ná samningum,“ segir í áskorun frá bæjarstjórnarfundi í Sandgerðisbæ í gær.