Skemmdarverk unnin í kirkjugarði

Talsverð skemmdarverk hafa verið unnin í kirkjugarðinum í Keflavík undanfarið. Búið er að rífa upp krossa af leiðum og einnig hafa tveir legsteinar verið brotnir. Það var vinnuflokkur í kirkjugarðinum sem tók eftir þessum hrikalegu ódæðisverkum þegar þau komu í vinnu sl. miðvikudag. Að sögn Lilju, flokkstjóra, var einnig búið að taka styttu af barnaleiði og mölbrjóta hana. Þetta er ekki í fyrsta skiptið sem gengið er um kirkjugarðinn á kvöldin og unnin slík skemmdarverk því fyrr í vetur voru krossar einnig rifnir upp af leiðum og þeim víxlað. Lilja vildi benda fólki sem á leið fram hjá kirkjugarðinum og býr í nágrenninu að vera meðvitað um það sem er að gerast því ekki sé hægt að vakta garðinn á kvöldinn. Lögreglu verður þó gert viðvart og mun hún keyra nokkrar eftirlitsferðir fram hjá kirkjugarðinum á kvöldin.
Það verður að teljast nokkuð líklegt að þarna sé um unglinga að ræða þar sem talsvert afl þarf til að rífa bæði krossa upp úr leiðum og að brjóta legsteina.