Sjúkraflutningamenn aðstoðuðu við fæðingu í Garði
– móður og barni heilsast vel
Sjúkraflutningamenn frá Brunavörnum Suðurnesja aðstoðuðu við fæðingu í heimahúsi í Garðinum í nótt. Þeir tóku á móti stúlkubarni og heilsast bæði móður og barni vel.
Óskað var eftir sjúkrabíl í Garðinn í nótt til að flytja þungaða konu á sjúkrahús. Eitthvað var barnið að drífa sig í heiminn því sjúkraflutningamennirnir voru rétt komnir á staðinn þegar barnið ákvað að koma í heiminn.
Fæðingin gekk vel. Samkvæmt upplýsingum frá Brunavörnum Suðurnesja voru móðir og barn flutt á kvennadeild Landspítalans í Reykjavík.
