Sjúkrabíll í forgangi: Torfær leið í útkall

Fyrr í dag greindum við frá óánægju ökumanna með lokun á Njarðarbrautar í Reykjanesbæ. Gatan, sem er lífæð Reykjanesbæjar, hefur verið lokuð í marga daga vegna framkvæmda við veginn. Nú undir kvöld varð ljósmyndari Víkurfrétta svo vitni að því þegar sjúkrabifreið í forgangsakstri lenti í vandræðum með að komast framhjá vinnuvél sem lokaði veginum. Sjúkrabílnum var ekið um torfæra leið framhjá vinnuvélinni og kastaðist sjúkrabíllinn talsvert til við aðfarirnar.

Tækjabifreið slökkviliðs Brunavarna Suðurnesja kom í kjölfar sjúkrabílsins. Strákarnir á tækjabílnum óku hins vegar yfir bílastæði framan við eina af þjónutubyggingum Nesvalla.
Framkvæmdirnar á Njarðarbraut tefja fyrir ferðum bíla í forgangsakstri, sem þurfa að fara aðrar og seinfarnari leiðir. Njarðarbrautin er sú leið sem sjúkralið, slökkvibílar og lögregla fara þegar útköll koma úr Njarðvík, af Reykjanesbraut eða úr t.d. Vogum.