Sjónvarp Víkurfrétta á Hringbraut

Vikulegur sjónvarpsþáttur Víkurfrétta verður frá næsta fimmtudegi sýndur á sjónvarpsstöðinni Hringbraut en á annað hundrað þættir hafa verið sýndir á ÍNN síðustu fjögur árin. Þátturinn fær andlitslyftingu og nafn sem hann bar í upphafi, Suðurnesjamagasín og verður á dagskrá á sama tíma, kl. 21.30 á fimmtudagskvöldum.

„Við hlökkum til samstarfs við Hringbrautarfólk en þökkum um leið Ingva Hrafni og ÍNN fyrir samstarfið. Ég þekki til margra á Hringbraut en við Sigmundur Ernir Rúnarsson, dagskrárstjóri áttum mjög gott samstarf á árum okkar hjá Stöð 2,“ segir Páll Ketilsson, ritstjóri Víkurfrétta.

Sigmundur segir það mikinn feng að fá Víkurfréttir til liðs við Hringbraut en stöðin vill efla hlut sinn á landsbyggðinni. Stöðin hefur getið sér gott orð fyrir skemmtilega og fjölbreytta dagskrá og fagmennsku.

Í fyrsta Suðurnesjamagasíni Víkurfrétta á Hringbraut verður rætt við nýjasta menningarverðlaunahafa Reykjanesbæjar, sýnt frá opnun sýningarinnar „Þó líði ár og öld“ í Hljómahöllinni, fjallað um marg verðlaunað læsisverkefni Leikskólans Holts í Innri-Njarðvík og kíkt í kjörbúð Samkaupa í Garði.

Þátturinn er auðvitað líka sýndur á Víkurfréttavefnum, vf.is sem og á kapalrás Kapalvæðingar í Reykjanesbæ.