Sigtryggur vann efnafræðikeppnina
Sigtryggur Kjartansson varð efstur í landskeppninni í efnafræði en úrslit keppninnar fóru fram 28.-29. mars. Alls tóku 116 nemendur úr 10 framhaldsskólum þátt í forkeppni. Þrettán efstu kepptu svo í úrslitakeppninni sem skiptist í fræðilega og verklega hluta. Sigtryggur varð þar í 1. sæti eins og áður sagði og verður einn fjögurra fulltrúa Íslands á Alþjóðlegu Ólympíuleikunum í efnafræði sem haldnir verða í Cambridge, Englandi, dagana 18.-27. júlí.
Sigtryggur hefur reyndar látið til sín taka í fleiri keppnum í vetur. Hann komst einnig í úrslitakeppni landskeppninnar í eðlisfræði og stóð sig með prýði. Sigtryggur varð einnig í 6. sæti í Þýskuþraut Félags þýskukennara en alls tóku 69 framhaldsskólanemendur þátt í henni. Í kjölfarið var honum boðin námsdvöl í Þýskalandi í sumar en þarf að hafna því boði vegna efnafræðikeppninnar á Englandi.
Það þarf ekki að taka fram að Sigtryggur er afburðanemandi en hann hefur verið í Gettu betur liði skólans undanfarin þrjú ár. Pilturinn er líka fjölhæfur utan veggja skólans en hann leikur m.a. á hljóðfæri og er liðtækur knattspyrnumaður.
