Sekúndum frá banaslysi á hættulegustu gatnamótum Suðurnesja

Ökumaður fólksbifreiðar var aðeins sekúndum frá banaslysi þegar bifreið var ekið í veg fyrir olíuflutningabifreið á gatnamótum Reykjanesbrautar og Grænásbrautar á tíunda tímanum í kvöld. Umrædd gatnamót eru í dag sögð þau hættulegustu á Suðurnesjum.

Ökumaðurinn var fluttur með sjúkrabifreið til á sjúkrahús í Reykjavík. Bílstjóri olíuflutningabifreiðarinnar var fluttur á Heilbrigðisstofnun Suðurnesja til skoðunar.

Ekki er vitað um meiðsli ökumanns fólksbifreiðarinnar þegar þetta er skrifað en viðbragðsaðilar á vettvangi slyssins sögðu að hurð hafi skollið nærri hælum og aðeins sekúndur ráðið því að olíubifreiðin hafi ekki farið í hlið fólksbílsins með alvarlegri afleiðingum.

Talsvert magn af olíu lak úr bílunum á slysstaðnum í kvöld en gat kom á eldsneytistank olíuflutningabílsins.

Umferðarslys eru tíð á þessum gatnamótum.