Segja réttast að ríkið leysi til sín GGE

Fulltrúar A-listans í bæjarráði Reykjanesbæjar, þeir Guðbrandur Einarsson og Eysteinn Jónsson, lýsa furðu sinni á því að sjálfstæðismenn skuli ráðast í sölu eigna fyrir vel á annan tug milljarða án þess að fyrir liggi umsögn sérfróðra aðila á hagkvæmni þess fyrir sveitarfélagið eins og skylt er samkvæmt sveitarstjórnarlögum . Á bæjarráðráðsfundi í morgun lögðu þeir til að kaupum á landsvæðum í eigu HS Orku yrði frestað þar til slík umsögn yrði fengin. Sjálfstæðismenn felldu tillöguna.

„Þá vekur það óneitanlega athygli að nota á hlut GGE í HS Veitum sem skiptimynt í þessum viðskiptum við Reykjanesbæ. Hvaða tilgangi þjónar það fyrir Reykjanesbæ að eignast yfir 70% hlut í fyrirtæki sem sér um dreifingu á vatni og orku til margra annara sveitarfélaga utan Reykjanesbæjar og greiða fyrir það rúma fjóra milljarða? Sé vilji til þess meðal íbúa Reykjanesbæjar að selja erlendum aðilum orkuframleiðsluhluta Hitaveitu Suðurnesja þá er rétt að gerð verði sú krafa að greitt verði fyrir með peningum,“segja Gubrandur og Eysteinn í bókun sem þeir lögðu fram í morgun

„Sú spurning hlýtur einnig að vakna hverjir standi að baki þessu tilboði. Geysir Green Energy hafa um langt skeið verið í fjárþurrð og hafa í fréttatilkynningum til fjölmiðla lýst því að hlutafjáraukning væri í vændum. Ekkert hefur heyrst frá fyrirtækinu um að þessar tilraunir til hlutafjáraukningar hafi skilað nokkrum árangri. Þeir sem að GGE standa voru bankar sem eru orðnir gjaldþrota og komnir í hendur ríkisins eða þá félög sem komin eru í greiðslustöðvun. Það hljóta því að vera erlendir aðilar sem standa að baki tilboði GGE. Rétt væri hins vegar fyrir ríkið að leysa til sín fyrirtækið á þessum tímapunkti og vinda ofan af þessari vitleysu sem nú er farin í gang. Það er mikill ábyrgðarhluti að veita sjálfstæðismönnum í bæjarstjórn Reykjanesbæjar og vinum þeirra í einkageiranum alræði í einkavæðingu orkuvinnslu á Íslandi,“ segja Guðbrandur og Eysteinn í bókun sinni.