Segja meirihlutann hafa keypt hús án heimildar

Bæjarfulltrúar A-listans í Reykjanesbæ gagnrýna að 20 milljóna króna kaup bæjarfélagsins á húsi í Njarðvík hafi ekki verið rædd og borin upp til samþykktar í bæjarstjórn eins og beri að gera samkvæmt  bæjarmálasamþykkt. Þeir líta svo á að sveitarfélagið hafi skuldbundið sig til greiðslu án heimildar.

Bæjarsjóður keypti húsið að Bergási 6 en kaupin eru tilkomin vegna breytinga sem bæjaryfirvöld gerðu á hæðarkvótum á götunni eftir að húsið var byggt.  Því er litið svo á að kaupin séu hluti af skipulags- og framkvæmdakostnaði við gerð Ásahverfis, samkvæmt því sem fram kom í máli Árna Sigfússonar, bæjarstjóra, á bæjarstjórnarfundi nú í vikunni.

Ólafur Thordersen, bæjarfulltrúi A-lista, gagnrýni harkalega vinnubrögð meirihlutans í málinu. Hann taldi að málið hefði átt að koma fyrir bæjarstjórn til samþykktar og vísaði í ákvæði bæjarmálasamþykktar þar að lútandi. Í henni segir að ekki megi stofna til útgjalda eða greiða fé úr bæjarstjóði nema heimild sé til þess í fjárhagsáætlun , útgjöldin séu lögbundin, samningsbundin eða samþykkt af bæjarstjórninni. Ólafur sagðist sem bæjarfulltrúi fyrst hafa heyrt um þessi kaup út í bæ.

Böðvar Jónsson, bæjarfulltrúi D-lista, sakaði A-listann um að vera með upphlaup vegna málsins.

Samið hefur verið við Körfuknattleiksdeild UMFN um lagfæringar á umræddri skekkju í götunni og mun deildin ætla að fá til liðsinnins við sig velunnara í verktakageiranum og afla þannig tekna fyrir starfsemi deildarinnar.
Bæjarfulltrúrar minnihlutans tóku fram að málið snerist ekki um það samkomulag, heldur eingöngu um vinnubrögð meirihlutans.