Samþykkja uppbyggingu Skólamatar við Iðavelli

Umhverfis- og skipulagsráð Reykjanesbæjar hefur samþykkt byggingaáform Skólamatar ehf. við Iðavelli 1 í Keflavík en félagið óskaði eftir auknum byggingarheimildum í samræmi við uppdrátt Riss verkfræðistofu dags. 30. desember 2021. Óskað er heimildar til að byggja tveggja hæða húsnæði austur af núverandi húsi. Gert verði ráð fyrir vinnslurými á neðri hæð en skrifstofu- og starfsmannarými á efri hæð. Á fundi umhverfis- og skipulagsráðs var samþykkt að senda erindið í grenndarkynningu. Engar athugasemdir bárust.

Skólamatur ehf. hefur verið með starfsemi á Iðavöllum í nokkrum húsum og hefur starfsemin verið í stöðugum vexti undanfarin ár. Félagið hefur í dag eignast alla matshluta á lóðinni Iðavellir 1 ásamt því að eiga hluta af húsnæðinu Iðavellir 3. Til stendur að nýta áfram allt það húsnæði sem er til staðar og bæta jafnframt við.

Til stendur að fara í endurbætur á húsnæðinu á lóðinni Iðavellir 1. Samhliða breytingum og endurbótum hefur Skólamatur ehf. óskað eftir heimild til að byggja tveggja hæða húsnæði, u.þ.b. 20x20m að grunnfletu austur af núverandi húsnæði. Í nýju húsnæði yrði gert ráð fyrir vinnslurými á neðri hæð en skrifstofum og starfsmannarými á efri hæð.