Samstarf um námskeið fyrir fólk í nýsköpun og vöruþróun

Frumkvöðlasetrið á Ásbrú og Miðstöð símenntunar á Suðurnesjum hafa undirritað samstarfssamning varðandi námskeiðahald fyrir frumkvöðla, sprotafyrirtæki og önnur fyrirtæki sem stunda nýsköpun og vöruþróun. Mun MSS sjá um utanumhald og skipulagningu þeirra námskeiða sem verða í boði í Frumkvöðlasetrinu.

Frumkvöðlasetrið á Ásbrú er rekið af Þróunarfélagi Keflavíkurflugvallar og er að hefja starfsemi í Eldey við Grænásbraut. Frumkvöðlasetrið býður fría handleiðslu og ráðgjöf, ýmis námskeið og fleira fyrir alla þá sem notið geta góðs af, hvort sem það eru frumkvöðlar, sprotafyrirtæki eða eldri fyrirtæki í rekstri sem hyggjast stunda nýsköpun og vöruþróun. Miðstöð símenntunar á Suðurnesjum hefur um langt árabil meðal annars boðið ýmis námskeið fyrir atvinnulífið. Samstarfið við Frumkvöðlasetrið styrkir það námsframboð enn frekar. „Það er mikill akkur í því fyrir okkur að fá svona öflugan aðila til samstarfs um námskeiðahald í setrinu,“ segir Þóranna K. Jónsdóttir, verkefnastjóri Frumkvöðlasetursins. „En það sem er mikilvægast er að fyrirtæki og frumkvöðlar á svæðinu nýti sér þetta. Við hvetjum fólk einnig til að koma óskum um námskeið á framfæri. Við erum hér til að efla aðila hér á svæðinu og því er mikilvægt að fá að vita beint frá þeim hvað það er sem þeir þurfa.“

„Dagskrá vetrarins er óðum að taka á sig mynd,“ segir Birna V. Jakobsdóttir , verkefnastjóri atvinnulífs hjá MSS. „Verið er að skipuleggja mörg spennandi og hagnýt námskeið og styrkir það framboð námskeiða og alla aðra þjónustu þegar aðilar á svæðinu vinna saman. Samstarfssamningur MSS og Frumkvöðlasetursins, á eftir að stuðla að enn betri þjónustu“.

Framundan í haust er námskeið í viðskiptaáætlunargerð (október) og námskeið þar sem sérstaklega verður lögð áhersla á fjármála- og rekstrarhluta viðskiptaáætlunarinnar (nóvember). „Fjármálahlutinn er yfirleitt sá hluti viðskiptaáætlunar sem fólki finnst erfiðast að vinna og því viljum við leggja sérstaka áherslu á þann hluta“, segir Þóranna. Frekari upplýsingar um námskeiðin, og skráningu, má finna á vef MSS, mss.is. Frekari upplýsingar um Frumkvöðlasetrið má finna á vefsíðu þess, incubator.asbru.is.

Á myndinni má sjá Kjartan Þór Eiríksson, framkvæmdastjóra Þróunarfélags Keflavíkurflugvallar og Guðjónínu Sæmundsdóttur, forstöðumann MSS, við undirritun samningsins. Víkurfréttamynd: Hilmar Bragi Bárðarson