Samkomulag um viðskilnað VL liggur fyrir

Meginlínur um viðskilnað Varnarliðisins á Keflavíkurflugvelli liggja fyrir í samningaviðræðum  íslenskra og bandarískra stjórnvalda en þar er gert ráð fyrir að íslenska ríkið yfirtaki eigur hersins, samkvæmt heimildum VF.

Á næsta fundi viðræðunefnda  ríkjanna er stefnt að því að ljúka málinu en í samkomulaginu er gert ráð fyrir að íslenska ríkið yfirtaki allar eigur bandaríska hersins á Keflavíkurflugvelli.
Bandaríkjamenn munu ekki þurfa að hreinsa varnarsvæðið en reiða fram ákveðna fjárhæð í staðinn. Hversu há sú fjárhæð verður liggur ekki ljóst fyrir en stefnt er að því að ljúka samkomulagi þar að lútandi á næsta fundi viðræðunefndanna.

Íslensk stjórnvöld koma einnig til með að hafa umsjón með eigum NATO á varnarsvæðinu og hefur verið auglýst eftir vertökum til að annast það verkefni.