Reykjanesbær: Mun sterkari staða þrátt fyrir andstreymi

Rekstrarniðurstaða bæjarsjóðs Reykjanesbæjar sýnir svo ekki verður um villst að tekist hefur að styrkja reksturinn umtalsvert á undanförnum árum, þrátt fyrir erfitt atvinnuástand. Augljóst er að bæjarsjóður mun standa mjög sterkur eftir þegar atvinnulífið tekur aftur við sér, vonandi á næsta ári, segir í bókun Sjálfstæðismanna á bæjarstjórnarfundi í gær.

Samkvæmt ársreikningi fyrir árið 2011 er hlutfall hagnaðar af rekstrartekjum, fyrir fjármagnsliði, með því mesta sem gerist hjá íslenskum sveitarfélögum.

Það mælist 15,2% hjá Reykjanesbæ og er það með því hæsta sem kynnt hefur verið í ársreikningum sveitarfélaga fyrir árið 2011.

Skuldir vegna fjárfestinga í atvinnulífi, skólamannvirkjum og innviðum eru enn háar. Svonefnt skuldahlutfall, var nýlega farið að nota til viðmiðunar um stöðu sveitarfélaga. Það mælir heildarskuldir og skuldbindingar á móti rekstrartekjum ársins. Á síðustu 10 árum hefur skuldahlutfall Reykjanesbæjar lækkað í samstæðureikningi úr 245% árið 2002, í rúmlega 230% árið 2011. Gangi áætlanir eftir mun skuldahlutfall bæjarsjóðs fara niður fyrir 200% á þessu ári.

Þrátt fyrir veruleg áföll í atvinnulífinu og mikla uppbyggingu í innviðum samfélagsins sýnir þessi samanburður að vel hefur tekist að halda í horfinu. Öllum er ljóst að staða Reykjaneshafnar vegna mikilla fjárfestinga í Helguvík sem enn hafa tafist, veikir fjárhagsstöðuna. Á sama hátt er öllum ljóst að um leið og atvinnuverkefni taka við sér í Helguvík, þar sem unnið er að uppbyggingu á margvíslegum verksmiðjurekstri, er unnt að leysa fjárhagsvanda hafnarinnar á fáeinum árum. Þá tekur höfnin og atvinnsuvæðið í Helguvík að leggja bæjarbúum til fjölbreytt og vel launuð störf og Reykjanesbæ góðan hagnað af rekstrinum.

Frá Helguvík. VF-mynd/Oddgeir Karlsson.