Rétt viðbrögð komu í veg fyrir mengun vatnsbóla

Bergur Sigurðsson hjá Heilbrigðiseftirliti Suðurnesja segir aðila sem komu að slysinu við Grindavíkurveg í hádeginu hafa brugðist alveg rétt við aðstæðum. Tankur með glussaolíu rifnaði af vörubíl við árekstur við fólksflutningabifreið og fór talsvert magn af glussanum, sem er þykk olíutegund, niður í jarðveginn. Meðal annars myndaðist glussaolíupollur á svæðinu.Bergur sagði í samtali við Víkurfréttir að slökkviliðið í Grindavík hafi verið fljótt á vettvang og þar hafi menn hafist handa við að hreinsa upp olíuna. Menguðum jarðvegi hafi verið mokað upp á vörubifreið.

Áreksturinn varð á vatnsverndarsvæðinu við Lága þar sem neysluvatni fyrir Reykjanesbæ, Grindavík, Sandgerði og Keflavíkurflugvöll er dælt upp. Bergur sagði að með réttum viðbrögðum og með því að fjarlægja jarðveg strax, eins og gert var í dag, hafi verið komið í veg fyrir frekari mengun á svæðinu. Olíutankar vörubíla geti borið allt að 400 lítra af eldsneyti og glussaolíutankar rúma margir hverjir allt að 200 lítra af glussa. Fari slíkt magn niður í jarðveginn á þessum slóðum og sé ekkert að gert geti vatnsbólum starfað hætta af. Þarna undir sé á vissum svæðum grunnvatn sem rennur með talsverðum hraða að vatnsbólum. Berist olía niður um sprungur sé voðinn vís. Það hafi hins vegar ekki gerst í dag og hjá Heilbrigðiseftirliti Suðurnesja séu menn ánægðir með viðbrögð á vettvangi.

Myndin: Frá slysstað í hádeginu. Tankurinn og glussapollur í vegarkantinum. VF-mynd: Hilmar Bragi Bárðarson