Rannsókn á hnífstungumáli á lokastigi

Gæsluvarðhald yfir 22 ára gamalli konu, úr svokölluðu hnífstungumáli af Suðurgötunni í Keflavík, rennur út í dag. Lögreglan á Suðurnesjum mun sennilega leggja fram ósk um framlengingu gæsluvarðhalds til Héraðsdóms Reykjanesss í dag. Rannsókn málsins er á lokastigi og er beðið eftir að málið verði tekið fyrir í hérðasdómi, að sögn Vísir.is.

Konan bankaði á útidyr hjá fjölskyldu í Reykjanesbæ á sunnudegi í lok september. Fimm ára gamalt stúlkubarn kom til dyra. Konan á að hafa stungið stúlkuna fyrirvaralaust og veitt henni lífshættulega áverka. Ekki er vitað hvað henni gekk til.

Konan var látin sæta geðrannsókn auk þess sem hún hefur verið í varðhaldi síðan hún var handtekinn sama dag og árásin átti sér stað.

Úrskurðar héraðsdóms er að vænta síðdegis í dag.