Rannsakað sem slys

Í gærkvöldi voru borin kennsl á lík sem fannst í fjörunni neðan við gömlu sundhöllina í Keflavík í gærdag. Kennslin voru staðfest með samanburði á fingraförum.

Líkið reyndist vera af 42 ára gömlum pólskum karlmanni sem búsettur var í Reykjanesbæ. Ekki er unnt að birta nafn mannsins að svo stöddu þar sem enn hefur ekki verið unnt að ná sambandi við ættingja hans.

Lögreglan á Suðurnesjum vinnur enn að rannsókn málsins og er það rannsakað sem slys. Við rannsóknina hefur lögreglan á Suðurnesjum notið aðstoðar frá tæknideild lögreglunnar á höfuðborgarsvæðinu og sérsveit ríkislögreglustjórans.