Prófkjör hjá S-listanum í Sandgerði
– verður haldið 22. mars nk.
S-listi Samfylkingarinnar og óháðra borgara verður boðinn fram í sveitarstjórnarkosningum í Sandgerðisbæ árið 2014. Þetta var samþykkt á opnum fundi S-listans og Samfylkingarfélagsins í Sandgerði síðastliðinn laugardag. Þá var einnig samþykkt að opið prófkjör fari fram laugardaginn 22. mars vegna vals á listann.
Í prófkjörinu verður kosið um sex efstu sætin og verða fjögur efstu bindandi. Jafnræði kynjanna verður tryggt með því að láta reglur um paralista gilda í þeim sætum sem kosið er binandi kosningu. Frestur til að lýsa framboði er til kl. 22:00 mánudaginn 10. mars 2014 og skal skila yfirlýsingu um framboð til fulltrúa í kjörstjórn.
Á fundinum var jafnframt kjörinn þriggja manna kjörstjórn vegna prófkjörsins og eru það Guðrún Arthúrsdóttir, Hafsteinn Þór Friðriksson og Jóhann Rúnar Kjærbo sem skipa hana.
