Óvissa núna en miklir framtíðarmöguleikar

Katrín Jakobsdóttir, forsætisráðherra segir að þrátt fyrir margvíslega óvissu núna vegna kórónuveirunnar og atvinnuleysis á Suðurnesjum þá séu mikil tækifæri á svæðinu til framtíðar litið, m.a. með tilliti til flugstöðvarinnar og ferðaþjónustunnar. Hún fjallaði um málefni Suðurnesja og svaraði spurningum á opnum fundi Vinstri grænna á Hótel Keflavík síðasta föstudag.

„Við vitum að kórónuveiran hefur áhrif á ferðaþjónustuna og getur því haft veruleg áhrif á Suðurnesjum. Við vitum líka að staðan gæti verið betri því hér hefur þurft að takast á við fall WOW flugfélagins og aukið atvinnuleysi í kjölfar þess,“ sagði Katrín.

Hún sagði að ríkisstjórnin hafi brugðist við því með viðbótarframlögum til ýmissa grunnstofnana á svæðinu, m.a. til heilbrigðismála og menntastofnana.

„Stóra málið að undanförnu hefur verið framlög til opinberra stofnana á Suðurnesjum. Það hefur verið til skoðunar og verið bætt. Það er mikilvægt að grunnstofnanir séu í takti við það sem er annars staðar. Við vitum af þessu og erum byrjuð að taka á málinu en þetta vill oft taka of langan tíma í kerfinu,“ sagði hún á fundinum þar sem hún svaraði einnig spurningum um Suðurnesjalínu 2 og fleira.

Katrín sagði að auka þyrfti framlög til rannsóknar og þróunar en þau hafa verið mest á höfuðborgarsvæðinu. Tækifæri væru nú til að efla þetta framlag úti á landi og þannig efla nýsköpun og þróun.

Hún sagði að ríkisstjórnin hafi verið að bæta í varðandi samgöngumálin enda þörfin mikil og brýn.

„Við ætlum að halda því áfram. Reykjanesbrautin er eitt af stóru verkefnunum þar. Þegar við horfum á fjárfestingar í samgöngum þá er ljóst að þær hafa verið of litlar og álagið er miklu meira en fyrir tíu árum. En við höfum gefið í og ætlum að gera áfram.“

Katrín sagði skilja áhyggjur Suðurnesjamanna af seinagangi í uppsetningu Suðurnesjalínu 2 en verið væri að vinna að því að flýta ferlinu sem þarf að fara í gegnum varðandi línulagnir. „Ég skil þessar áhyggjur og veit líka ástæður en það hvílir á okkur núna hvernig við getum einfaldað þetta ferli þannig að það nýtist í öllum svona tilfellum. Ekki bara Suðurnesjalínu 2. Ég held að málflutningur íbúa og sveitarfélaga hafi skilað sér og við sjáum nú þegar breytingar inni í pólitíkinni og á Alþingi sem eru í rétta átt.“

Hún segir að þegar hún hafi verið yngri hafi hún oft farið með foreldrum sínum bíltúr um Suðurnesin. Hún segir möguleikana mikla í ferðaþjónustunni og nefnir til dæmis jarðvanginn, Geopark. „Ég elskaði þetta svæði, hraunið og náttúran eru mögnuð. Þetta er eitt af mínum uppáhaldssvæðum,“ sagði forsætisráðherra.