Óttast um pólska skútu sem var í Keflavík

Leit stendur yfir að pólskri skútu sem ekki hefur skilað sér til Aberdeen í Skotalandi en hún var að koma frá Íslandi, samkvæmt fréttavef BBC og Morgunblaðið greinir frá á netinu.

Þar kemur fram að skútan, Syrenka, hafi átt að koma til Aberdeen í morgun en ekkert hafi spurst til hennar. Landhelgisgæslan í Færeyjum og Hjaltlandseyjum eru að reyna að ná talstöðvarsambandi við skútuna.

Talið er að skútan hafi farið frá Keflavík á sunnudag.

BBC hefur eftir talsmanni landhelgisgæslunnar í Aberdeen að unnið sé að því að vara skip og hafnaryfirvöld við á siglingarleiðinni og sjófarendur beðnir um að svipast um eftir skútunni.

Landhelgisgæslan kom skútunni til bjargar á dögunum með bilaðan seglbúnað en þá var skútan stödd við Reykjanes. Var hún dregin til Keflavíkur af léttabáti af af varðskipinu Tý.

Myndir: Syrenka í höfninni í Keflavík á dögunum. Víkurfréttamyndir: Hilmar Bragi Bárðarson

 

 

 

 

 

 

 

 

 

 

 

 

 

 

 

 

 

 

.