Opnað fyrir umferð á nýju hringtorgi við Aðalgötu og Iðavelli

Opnað hefur verið að nýju fyrir umferð á gatnamótum Aðalgötu og Iðavalla í Reykjanesbæ en þar hafa að undanförnu staðið yfir framkvæmdir við gerð nýs hringtorgs. Er malbikunarframkvæmdum lokið en vegfarendum er bent á að fara varlega því eftir er að ljúka vinnu við frágang hringtorgsins og nánasta umhverfi þess. Því á að vera lokið um miðjan desember. Á sama tíma á að ljúka framkvæmdum við nýtt hringtorg við Hafnargötu og Flugvallarveg.

Þessi mynd er tekin á föstudaginn þegar malbikunarframkvæmdir stóðu yfir á nýja hringtorginu við Aðalgötu og Flugvallarveg. Tilkoma hringtorgsins ætti að auka umferðaröryggi þarna til muna en löngum hefur verið kvartað yfir því hversu “blint” þetta horn hefur verið.