Ölvaður ökumaður með farþega á vélarhlífinni

Sérkennilegur farþegaflutningur vakti athygli Lögreglunnar á Suðurnesjum sem var við hefðbundið eftirlit aðfararnótt laugardagsins. Þá var bíl ekið eftir Aðalgötu í Reykjanesbæ og sat maður á vélarhlíf hans. Lögregla stöðvaði aksturinn og í viðræðum við ökumann fannst áfengislykt af honum. Öndunarpróf staðfesti áfengisneyslu og var hann því handtekinn og færður á lögreglustöð.

Annar ökumaður sem ók um götur Reykjanesbæjar var svo upptekinn við að tala í farsíma að hann virti ekki biðskyldu og ók í veg fyrir lögreglubíl. Hann notaði ekki handfrjálsan búnað og viðurkenndi brot sín.

Afskipti voru höfð af fáeinum ökumönnum til viðbótar vegna gruns um að þeir ækju undir áhrifum vímuefna.